Filmi epik 3D i Martin Scorsese, “Hugo”, u kandidua më shumë se të gjithë filmat e tjerë, ndërsa komisioni i çmimeve “Oscar” shpalli pretendentët për vlerësimin më prestigjioz në botën e kinematografisë. 

Midis 11 kategorive ku “Hugo” është kandidat përfshihet edhe ajo e “filmit më të mirë” dhe “regjizorit më të mirë”, ndërsa Meryl Streep e George Clooney figurojnë midis të kandiduarve për të fituar në kategeritë e Aktores dhe Aktorit më të Mirë Protagonist.

Çmimet e edicioni të 84-t të “Çmimeve të Akademisë” do të shpërndahen në 26 shkurt në Los Anxhelos dhe siç është tradita, nominimet shpallen që një muaj më parë. Në garë janë punimet e vlerësuara si më të mirat e vitit 2011.

Hugo, historia e një djali jetim që jeton brenda një ore gjigante në një stacion francez treni pasohet nga filmi pa zë “Artisti” (“The Artist), i cili konkurron për të fituar dhjetë çmime “Oscar”.

Francezi Michel Hazanavicius është në garë për të fituar çmimin e skenaristit më të mirë dhe regjizorit me të mirë në komedi, ndërsa bashkëshortja e tij, Berenice Bejo, është kandiduar si aktorja më e mirë joprotagoniste.

Ylli i filmit “Artisti”, Jean Dujardin, konkurron për “Oscar” e aktorit më të mirë përkrah Clooney (për rolin në The Descendants), Demian Bichir (A Better Life), Brad Pitt (Moneyball) dhe britanikut Gary Oldman (Tinker Tailor Soldier Spy),

Sreep, e cila realizoi një interpretim të përkryer të ish-Kryeministres së Britanisë së Madhe, Margaret Thatcher, në filmin “Iron Lady” (Zonja e Hekurt), ka marrë kandidimin e saj të 17, më shumë se çdo aktor tjetër.

Kandidatet e tjera për të fituar në kategorinë e Aktores më të Mirë Protagoniste janë Glenn Close (Albert Nobbs), Viola Davis (The Help), Roonet Mara (The girl with a Dragon Tattoo) dhe Michelle Ëilliams (My week with Marilyn).

Pas “Hugo” dhe “Artistit”, filmat e përzgjedhur për më shumë çmime “Oscar” ishin “Ndihma” (The Help), “Topi i Parave” (Moneyball), “Kali i Luftës” (War Horse) me nga gjashtë kandidime dhe “Pasardhësit” (The Descendants), me pesë.

Burimi: Top-channel